‘Bienalja e Arkitekturës së Kosovës 2022’ ndanë çmimet për projektet më të mira

Shoqata e Arkitekturës së Kosovës ka organizuar Bienalen e Arkitekturës 2022. E kryesuar nga një juri ndërkombëtare dhe vendore, konkursi përfshiu 74 dizajne të ndryshme nga Kosova në 15 kategori të ndryshme.

Kryesues i jurisë vlerësuese për këtë ngjarje ishte arkitekti botëror Filippo Innocenti një prej drejtuesve të zyrës së Zaha Hadidit.

Arkitektja Gonca Pasolar, arkitektët Armand Vokshi dhe Martin Panovski, ishin pjesë e jurisë.

Juria vlerësuese ishte e kompletuar me arkitektët Vlora Navakazi, Bujar Demjaha dhe Binak Beqaj.

Po ashtu, pjesëmarrës ishin pjesëtarët e Asociacionit të Kosovës të kryesuar nga Masar Dushi, nënkryetarët Bledion Baraliu e Flaka Xërxa – Beqiri, anëtarët e kryesisë Ardit Jedrashi, Blerim Bajraktaraj, Merita Gorani – Bajri, Freskim Sylejmani, Dasara Pula dhe zyrtarja ekzekutive Rona Berisha.

Maden Group është shpërblyer me çmimin kryesor si dhe janë ndarë shtatë çmime të tjera për kategori të ndryshme.

Projekti më i mirë i ndërtesave Art/Kulturë – AMC Multimedia, vendi i parë
Projekti më i mirë i ndërtesave të banimit – Kulla Zotnise / Front, vendi i dytë
Projekti më i mirë i ndërtesave komerciale – Europipe, vendi i dytë
Projekti më i mirë i ardhshëm në zhvillim – Kompleksi Çeshmja, vendi i parë
Projekti më i mirë i enterierit – Homme, vendi i dytë
Projekti më i mirë i intervenimit në ndërtesa – Heb’s Podujevë, vendi i dytë
Projekti më i mirë i projekteve të parealizuara – Gate Residence, vendi i parë