E konfirmojnë në Berlin: Propozimi franko-gjerman bëhet pjesë e dialogut të Brukselit

04/11/2022

Presidentja e Komisionit Europian, Ursula von der Leyen, e ka konfirmuar se propozimin franko-gjerman e kanë përfshirë në dialogun Kosovë-Serbi.

Ajo këtë e konfirmoi kur u pyet nga gazetarët në konferencën e përbashkët për media me kancelarin gjerman Olaf Scholz dhe kryeministrin shqiptar Edi Rama, raporton Gazeta Express.

“E kemi integruar këtë gjë [propozimin franko-gjerman] në dialog, pra është shumë e domosdoshme. Bëjmë thirrje për të dyja palët që të ecin më tutje sepse kjo është një urë që po ndërtohet për të zgjidhur një problem që mund të zgjidhet. Është në të mirë edhe të procesit të përshpejtuar të integrimit. Procesi është i bazuar në meritë”, tha von der Leyen.

Në aspektin e anëtarësimit të Ballkanit Perëndimor në BE, ajo tha se ka një frymë ndryshimi për shkak të gjendjes gjeopolitike

“Është me rëndësi kritike që të ecet tutje me procesin e Ballkanit Perëndimor dhe këtu kemi qëndrim të përbashkët. Ne duam që miqtë tonë të jenë brenda BE-së.”

Written by: ClubFm Kosova

Rate it