Raste të reja me COVID-19, Kina mbyll tregun më të madh të elektronikës në botë

Qyteti jugor i Kinës, Shenzhen, mbylli të hënën tregun më të madh të elektronikës në botë dhe pezulloi transportin publik aty pranë pasi autoritetet zbatuan bllokime në të gjithë lagjen në përgjigje të një numri të vogël rastesh të reja me Covid-19.

Sipas mediave të huaja, përcjell Telegrafi, Huaqiangbei, një zonë e ngjeshur tregtare, shtëpi me mijëra stalla që shesin komponentë kompjuteri, pjesë të telefonit celular dhe mikroçipa, është ndër tre lagjet e vendosura nën një bllokim të detyrueshëm katër-ditor në rrethin Futian, sipas qeverisë së qarkut.

Dhe banorëve në ato lagje u ndalohet të dalin nga shtëpitë e tyre, përveç testimit për Covid-19, të cilin ata duhet ta bëjnë çdo ditë deri të enjten.

Si pasojë, të gjitha bizneset në zonat e prekura janë mbyllur deri të enjten, me përjashtim të supermarketeve, farmacive dhe spitaleve.

Ngrënia në restorant është gjithashtu e pezulluar, me të lejuara vetëm “marrje me vete e ushqimit”.

Kina është një nga vendet e fundit në botë që ende zbaton masa të rrepta zero-Covid, të cilat mbështeten në mbikëqyrjen gjithëpërfshirëse dixhitale, testime masive, karantina të gjera dhe bllokime të menjëhershme.

Të martën, Shenzhen, një qendër ndërkombëtare e teknologjisë me 18 milionë banorë, raportoi vetëm 35 infeksione, përfshirë 11 raste asimptomatike.

Por qasja e ashpër ka parë dhjetëra lagje në të gjithë Shenzhen të identifikuara si “zona me rrezik të lartë” dhe të vendosura nën urdhra të rreptë bllokimi.

Në një konferencë shtypi të hënën, zyrtarët e Shenzhen thanë se shpërthimi është nxitur kryesisht nga nënvarianti i ri Omicron BF.15, për të cilin ata thanë se është më i transmetueshëm dhe më i vështirë për t’u zbuluar.

Strategjia e Kinës për zero-Covid është përballur me sfida në rritje nga varianti shumë infektiv Omicron, me zona të mëdha të vendit që i nënshtrohen bllokimeve të vazhdueshme dhe testimeve të përditshme.

Kufizimet e pafundme kanë goditur jetën e përditshme dhe i kanë dhënë një goditje të rëndë ekonomisë së ngadalësuar.

Në korrik, papunësia e të rinjve në Kinë arriti një rekord të lartë, me një në pesë të rinj pa punë. /Telegrafi/