Kurti: Nuk jam në dijeni për ndonjë plan rreth formimit të Asociacionit të komunave me shumicë serbe

Kryeministri Albin Kurti e ka demantuar raportuesen për Kosovën në Parlamentin Eruopian, Viola von Cramon lidhur me një plan për implementimin e marrëveshjes për themelimin e Asociacionit të komunave me shumicë serbe.

Kurti tha se nuk është në dijeni për ndonjë plan për formimin e Asociacionit, raporton Gazeta Express.

Kurti tha se Kushtetuta e Kosovës nuk lejon asociacione mbi baza etnike.

“Kushtetutshmëria në Kosovë nuk toleron asociacione mbi baza etnike. Mund të ketë asociacione mbi baza zhvillimore, por jo mbi baza etnike. Dhe le të mos harrojmë se po i pyete të gjithë qytetarët e Kosovës pa dallim etnie, nacionaliteti, religjioni, askush s’e ka prioritet një asociacion të tillë”, tha ai.

Raportuesja për Kosovën në Parlamentin Evropian, Viola von Cramon, ka thënë se ka informata se Qeveria e Kosovës e ka një propozim që lidhet me zbatimin e marrëveshjes për Asociacionin e komunave me shumicë serbe.