Abazoviq pas takimit me Osmanin: Do të konkretizojmë projekte të përbashkëta në fushën e ekonomisë dhe transportit

Presidentja e Kosovës, Vjosa Osmani, është takuar me kryeministrin e Malit të Zi, Dritan Abazoviq në margjina të Samitit të Demokracisë në Evropën Juglindore që po mbahet në Mal të Zi.

Për takimin bilataral me Osmanin ka shkruar kryeministri i Malit të Zi, Abazoviq.

I pari i Qeverisë së Malit të Zi ka thënë se me Presidenten e Kosovës kanë diskutuar për projektet e përbashkëta në fushën e ekonomisë.

“Detyra e përbashkët e Malit të Zi dhe Republikës së Kosovës është që në periudhën e ardhshme të konkretizojnë projekte me interes të përbashkët në fushën e ekonomisë dhe transportit. Ishte kënaqësi të bisedoja sot me Presidenten e Kosovës, Vjosa Osmani, në margjina të Samitit të Demokracisë në Evropën Juglindore, Budva”, ka shkruar Abazoviq në Twitter.

Megjithatë, gjatë një diskutimi të panelit në Samitin e Demokracisë në Evropën Juglindore, Presidentja Osmani, dhe kryeministri Abazoviq, shkëmbyen replika lidhur me nismën rajonale “Ballkani i Hapur”.