Kryeministri Kurti del me video-mesazh për t’u vaksinuar kundër COVID-19

Kryeministri i Kosovës, Albin Kurti, ka bërë thirrje që të vaksinoheni kundër COVID-19, shkruan Reporteri.net.

Kurti, këtë thirrje e ka bërë përmes një video-mesazhi në Facebook, të publikuar nga Ministria e Shëndetësisë.

Thirrja e Kurtit publikuar nga MSH:

Mesazhi i Kryeministrit të Republikës së Kosovës, Albin Kurti, për vaksinimin kundër COVID-19

Falë fushatës së suksesshme të vaksinimit, deri më sot, Kosova ka arritur të vaksinojë me të paktën dy doza 2/3 e qytetarëve 18 vjeç e lart, duke arritur shkallën më të lartë të vaksinimit kundër COVID-19 në rajon.

Por, ky sukses nuk mundet dhe nuk duhet të mbetet me kaq. Qytetarët duhet të vazhdojnë të vaksinohen, sidomos me dozën përforcuese, sepse me kalimin e kohës, imuniteti i krijuar përmes vaksinës vjen duke rënë.

Vaksinohu për të mbrojtur veten dhe të tjerët përreth!