Komuna e Prishtinës jep detaje për krasitjen e pemëve në shesh

Komuna e Prishtinës ka njoftuar rreth krasitjes së drurëve në kryeqytet. Përmes një komunikate për media, të martën, komuna ka bërë të ditur se ndërmarrja “Hortikultura” deri më tani ka përfunduar pastrimet fito-sanitare në kryeqytet.

Siç njoftohet, në kuadër të pastrimit fitosanitar është rregulluar edhe forma e drurëve dekorativë gjegjësisht kurorës se tyre, prerja e degëve të thara, dhe të thyera si dhe degëve potencialisht të sëmura.

“Gjatë pastrimit fito-sanitar rendësi të veçantë i është dhëne kërkesës së bërë nga Komuna e Prishtinës, përkatësisht Drejtoria e Parqeve. Degët të cilat janë krasitur janë bartur në lulishten e kësaj ndërmarrje.
Qëllimi i krasitjes është bazuar në aspektin sanitar-estetik, ruajtja e ekuilibrimit të organeve nëntokësore dhe mbitokësore të bimëve, që konsiston në baraspeshimin e marrjes se ujit dhe materieve ushqyese dhe shpenzimit të këtyre materieve nga vetë bima”, thuhet në njoftim.

Sipas njoftimit, e gjitha kjo bëhet në drejtimin e ruajtjes se gjendjes se përgjithshme shëndetësore të vetë bimës.