Zelensky iu drejtohet të pranishmëve në Davos, vendos një kusht për të biseduar me Putinin

Presidenti i Ukrainës Volodymyr Zelensky tha se ishte i gatshëm të bisedonte ekskluzivisht drejtpërdrejt me presidentin rus Vladimir Putin, jo përmes ndërmjetësve, shkruan agjencia kroate e lajmeve, Index, përcjell Express.

“Unë mund të flas vetëm me presidentin drejtpërdrejt, pa ndërmjetës”, tha Zelensky.

Zelensky iu drejtua të pranishmëve në Forumin Ekonomik Botëror në Davos. “Ukraina do të luftojë derisa të rimarrë të gjithë territorin e saj”, u tha Zelensky atyre.

Presidenti ukrainas tha se Moska duhet të tërheqë trupat e saj në linjat në të cilat ishin përpara se të fillonte pushtimi rus më 24 shkurt. “Ky mund të jetë hapi i parë drejt negociatave”, tha ai, duke shtuar se Rusia po blen kohë në negociatat e saj me Ukrainën.

Ai dënoi gjithashtu mungesën e unitetit të vendeve perëndimore kur bëhet fjalë për luftën në Ukrainë. “Pyetja ime është: a ka unitet në praktikë? Unë nuk e shoh atë.” Ai theksoi nevojën për “mbështetje të një Europe të bashkuar”.