Turqia ndalon anijen ruse të mallrave “që mbante grurë të vjedhur”

Zyrtarët doganorë turq kanë ndaluar një anije ruse mallrash që transportonte grurë për të cilën Ukraina pretendon se është vjedhur, sipas ambasadorit të vendit.

“Ne kemi bashkëpunim të plotë. Anija është aktualisht në hyrje të portit, ajo është ndaluar nga autoritetet doganore të Turqisë”, ka thënë të dielën Vasyl Bodnar, përcjell Telegrafi.

Bodnar tha se fati i anijes do të vendoset nga një takim i hetuesve të hënën.

Ukraina i kërkoi Turqisë të ndalonte anijen të premten pasi dyshohet se përmban një ngarkesë drithi të marrë nga porti Berdyansk i pushtuar nga Rusia.

Anija e mallrave me flamur rus Zhibek Zholy u fotografua pranë bregut të portit Karasu të Detit të Zi të shtunën pasdite. /Telegrafi/