Shefi i BE-së dhe disa ambasadorë dalin me autobus për ta vizituar jugun e Kosovës

Shefi i BE-së në Kosovë, Tomas Szunyog, ka publikuar një fotografi nga autobusi bashkë me ambasadorë të tjerë rrugës për të vizituar jugun e Kosovës.

Szunyog ka thënë se vizita ka për qëllim të dëshmojë nga afër kontributin e BE-së në zhvillim ekonomik, raporton Gazeta Express.

“Në rrugë sot. Së bashku me anëtarët e familjes së BE-së, përfshirë ambasadorët, po vizitojmë Kosovën Jugore për të dëshmuar drejtpërdrejt kontributin e BE-së në zhvillimin ekonomik, fuqizimin e grave dhe mbrojtjen e trashëgimisë kulturore”, ka shkruar ai.

Dy javë më parë, ambasadorët e vendeve të QUINT-it u bënë bashkë për të vizituar Manastirin e Deçanit për të parë nga afër kontestin mes Komunës dhe tempullit fetar mbi pronën përreth.

Ambasadorët i kanë bërë thirrje vazhdimisht qeverisë që të zbatojë vendimin e Kushtetueses për Manastirin e Deçanit.