Projektligji për Paga edhe një ditë në konsultim publik

Projektligji për Paga të Sektorit Publik më 15 shtator kishte dalë në konsultim publik, ku të gjitha palët kanë pasur mundësinë që të japin mendimet e tyre për 15 ditë pune.

Ministri i Punëve të Brendshme, Xhelal Sveçla pati thënë se konsultimi publik do të jetë deri më 6 tetor.

“Për 3 javë nga sot, të gjithë do të keni mundësinë të adresoni çdo koment apo sugjerim lidhur me këto dy projekt-ligje apo pjesë të caktuara të tyre. Si Ministri e mirëpresim kontributin e të gjitha palëve të interesit, në mënyrë që këto dy projekt-ligje të ofrojnë më të mirën e mundshme”, pati shkruar Sveçla, përcjell Telegrafi.

Duke e publikuar të plotë dokumentin, Zyra e Kryeministrit ka nxjerr edhe koeficientët e propozuar për të gjithë punëtorët shtetërorë, ku sipas tyre është propozuar që të jetë paga.

“Situata aktuale sa u përket pagave që realizohen nga buxheti i shtetit ka krijuar një situatë komplekse për shtetin e Kosovës. Kjo situatë është si rezultat i një numri relativisht të lartë të akteve të veçanta ligjore dhe nënligjore, apo edhe vendimeve me të cilat rregullohen dhe përcaktohen niveli i pagave dhe kompensimeve”, thuhet në arsyetimin e konsultimit.