Muzikantë të jashtëzakonshëm nga Shqipëria dhe bota në festivalin e Himarës

Ministri i Ekonomisë, Kulturës e Inovacionit, Blendi Gonxhja, u kujtoi sot artdashësve se së shpejti vjen një festival me muzikantë të jashtëzakonshëm nga Shqipëria dhe bota.

Bëhet fjalë për Himara International Music Festival, i cili do të zhvillohet nga 18 deri më 22 gusht e që premton të jetë një eksperiencë e paharrueshme, me artistë nga e gjithë Europa.

“Nën këmbët e kalasë shekullore, midis gurëve të lashtë dhe maleve të vetëtimës një skenë natyrore u krijua, për të thënë “Muzikë Jeho”, shkroi ministri Gonxhja në rrjetet sociale.

Himara International Music Festival lind si një projekt muzikor ku gjithëkush mund të përjetojë muzikën e tij të preferuar. Edicionin e parë ky festival e shënoi në 2022. Festivali i Himarës sjell një menu të pasur të gjinive me traditë si muzika klasike, tango, jazz dhe chanson të ofruar nga muzikantë me përvojë. Interpretimet më parë janë kryer në një hapsirë intime midis shtëpive të vjetra dhe Kishës së Gjithë Shenjtorëve në Himarë-fshat. Në këtë edicion aktiviteti do të zhvillohet kryesisht në një nga sallat e bashkisë së qytetit por do të ketë aktivitete edhe në Himarën e vjetër, pranë kalasë.

Përveç instrumentistëve, këtë vit do të jenë të ftuar edhe artistët e një grupi polifonik.

Ky festival synon të rritet në frymën e zhvillmit të shoqërisë, bazuar mbi trashëgiminë kulturore më të mirë, si dhe të traditave muzikore ndërkombëtare me të cilat jemi të lidhur pazgjidhmërisht./atsh/KultPlus.com