Filmi “Trapped by Law” shfaqet sot në Kino Armata

Filmi “Trapped by Law” nga Sami Mustafa, i pasuar nga një panel diskutimi mbi përfshirjen e komuniteteve jo-shumicë në shoqëri në Kosovë me Almira Bajramin nga Ministria për Komunitete dhe Kthim, Avni Mustafën nga Roma Versitas Kosova dhe Sakibe Jasharin nga Zyra e Këshillit të Evropës në Prishtinë; do të shfaqet sot më datë 15 shkurt në ora 18:00 në Kino Armata.

Eventi organizohet nga Manifesta 14 Prishtina dhe përkrahet nga United Nations Mission in Kosovo (UNMIK).

Filmi “Trapped by Law” është një portretizim prekës i betejave me të cilat përballen dy vëllezërit e rinj, Kefaet dhe Selami, teksa lundrojnë në kompleksitetin e ligjit të “riintegrimit të detyruar” të nënshkruar mes Kosovës dhe Gjermanisë, së bashku me shtetet e tjera të BE-së. Ky film i fuqishëm, i xhiruar gjatë një periudhe prej pesë vitesh, tregon historinë e rrugëtimit të dy vëllezërve përmes ndarjes së tyre të detyruar nga familja, miqtë dhe kulturën hip-hop ku ata u rritën.

Kjo histori e ndarjes së familjes, e treguar përmes thjerrëzave të kulturës hip-hop, është një portret i mprehtë i përvojave të komuniteteve të margjinalizuara dhe luftës për drejtësi. Përmes filmit, audienca do të kuptojë më thellë vështirësitë me të cilat përballen komunitetet e margjinalizuara dhe barrierat sistematike që i pengojnë ata të kenë akses në të drejtat dhe liritë e tyre. / KultPlus.com