Ekzekutivi i Apple për Metaverse-n: Është një ‘fjalë që nuk do ta përdor kurrë’

Ekzekutivi i Apple, Greg Joswiak, hodhi një vështrim interesant rreth vizionit të Mark Zuckerberg për Metaverse-n gjatë një konference të martën.

Joswiak, zyrtari i lartë i Apple i marketingut në mbarë botën, tha se metaverse është një “fjalë që nuk do ta përdor kurrë”, kur u pyet për koment mbi këtë temë në një konferencë të organizuar nga The Wall Street Journal, përcjell Telegrafi.

Apple ka vendosur t’i shmanget terminologjisë në të kaluarën, edhe pse punon me kufjet e veta të kombinuara AR dhe VR.

Në fillim të këtij muaji, CEO Tim Cook tha se kompania shmang përdorimin e fjalës “metaverse” sepse edhe një “person mesatar” nuk e di se çfarë do të thotë.

Ndërkohë, Mark Zuckerberg e ka bërë metaversen fokusin (dhe emrin) kryesor të kompanisë së tij, të njohur më parë si Facebook.

Zuckerberg ka thënë se ai parashikon një të ardhme ku njerëzit lidhen në një univers dixhital duke përdorur avatar dhe ka shpenzuar 15 miliardë dollarë deri më tani në përpjekjen për ta bërë realitet atë vizion.

Por drejtuesit e kompanive konkurruese si Apple dhe Snap kanë dyshime të mëdha për vizionin e tij për të ardhmen.

Në vend të kësaj, Cook dhe CEO i Snap, Evan Spiegel, kanë vendosur të fokusojnë kompanitë e tyre rreth realitetit të shtuar kundrejt atij virtual.

Ndërsa VR e çon individin në një peizazh të rikrijuar plotësisht në mënyrë dixhitale, AR kombinon përmbajtjen e krijuar nga kompjuteri me botën reale – që do të thotë se në AR përmbajtja dixhitale mbivendoset mbi pamjen e një individi për botën reale.

Apple është një nga konkurrentët më të mëdhenj të Meta-s kur bëhet fjalë për shitjen e pajisjeve për metaverse.