“Dardanët” premtojnë spektakël në ndeshjet e marsit, kërkojnë t’i kthehet gjallëria Kombëtares

08/03/2022

Kombëtarja e Kosovës këtë muaj do t’i zhvillojë dy ndeshje miqësore, me Burkina Fason dhe me Zvicrën.

Verdhekaltrit do të rikthehen kështu në fushën e blertë për herë të parë që nga nëntori i vitit të kaluar.

E tifozët “Dardanët” mezi po presin t’i shohin më të dashurit e tyre duke luajtur.

Tifozët besnikë të Kosovës premtojnë spektakël në ndeshjen me Burkina Fason, e cila do të luhet më 24 mars në Prishtinë.

Ata njëherësh i ftojnë të gjithë që t’i bashkohen festës në muajin mars, i cili është i veçantë për vendin tonë, pasi konsiderohet si muaj i rezistencës, i lavdisë dhe i krenarisë.

“Dardanët” kërkojnë që të gjithë të kontribuojnë që të rikthehet gjallëria e dikurshme në Kombëtare, e cila e kaloi një vit të zbehtë.

“Dardanët në ndeshjen ndaj Burkina Faso premtojnë mbështetje të plotë për djelmoshat tanë në fushë, si dhe organizim e përgatitje që s’do t’i lënë asgjë rastësisë. I ftojmë të gjithë t’ia rikthejmë kombëtares tonë atë shkëndijën e nevojshme, ku klima dhe ambienti i ngrohtë i organizuar nga ne, mundëson që lojtarët ta japin më të mirën prej vetës dhe kësisoj bashkarisht të korrim rezultate të mirëseardhura. Duam ta rikthejmë atë gjallëri ku ndeshjet e kombëtares sonë bëhen temë e ditës për çdokë, në çdo hapësirë, nga secila shtresë moshe”, kanë shkruar “Dardanët”.

Written by: ClubFm Kosova

Rate it