Baraliu: Kushtetutës i nevojiten përmirësime, Kosova të përcaktohet si shtet i shqiptarëve

“Ka nevojë për përmirësime në gjithë tekstin e Kushtetutës, që nga preambula për arsye se për fat të keq, përkundër rëndësisë që ka ky dokument, është përcaktues edhe i Republikës dhe legjislacionit në tërësi. Preambula për shkak se është përgatitur dhe është servuar, për të mos thënë imponuar nga të huajt, nuk ishte as vullneti i shprehur i qytetarëve të saj për të pasur një Republikë dhe një Kushtetutë çfarë ata do të donin”, ka thënë ai.

Sipas Baraliut, në preambulë është shënuar vetëm e ardhmja e Kosovës dhe jo e kaluara, ndërkohë që në çdo kushtetutë të vendeve sovrane në pjesën e preambulës shënohet edhe e kaluara e shtetit dhe popullit.

Ai ka thënë se me Kushtetutë do të duhej të përcaktohej se Kosova është shtet i shqiptarëve si popull shumicë dhe i etnive tjera që jetojnë në të, si dhe të përcaktohet edhe e kaluara historike e komunitetit më të madh dhe e të tjerëve.

“Për shkak të rrethanave në të cilat është shpallur Republika e Kosovës, nuk kemi arritur që të jemi sovran në përpilimin e Kushtetutës dhe në përcaktimin e natyrës së shtetit”, tha ai.

“Në nenin e parë të Kushtetutës do të duhej të ishte shkruar se ky është shtet i shqiptarëve dhe të tjerëve që jetojnë në të. Megjithatë është shtet multientik e jo shtet nacional dhe prandaj nuk është përmendur e kaluara sa dramatike po ashtu edhe heroike e popullit të Kosovës”, ka shtuar ai.

Të shtunën, më 9 prill, Republika e Kosovës shënoi Ditën e Kushtetutës. Në këtë datë të vitit 2008 është ratifikuar Kushtetuta, kurse ka hyrë në fuqi më 15 qershor të po atij viti.

Pjesa më e madhe e kësaj kushtetute rrjedh nga plani i ish-presidentit finlandez, Martti Ahtisaarit, duke u dhënë të drejta specifike grupeve minoritare.