Kush mund ta zëvendësojë Boris Johnsonin – sondazhet e favorizojnë Sekretarin e Mbrojtjes, Ben Wallace

Pyetja në mendjen e shumicës së njerëzve është se kush do të jetë kryeministri i ardhshëm i Mbretërisë së Bashkuar – dhe lista e kandidatëve të mundshëm është e gjatë.

Disa sondazhe të reja nga YouGov, ku u anketuan më shumë se 700 anëtarë të Partisë Konservatore, Sekretari i Mbrojtjes, Ben Wallace është favoriti kryesor – me 13 për qind të mbështetjes.

Ai ndiqet nga Penny Mordaunt (12 për qind), ministrja e shtetit për politikën tregtare, raporton bbc.

Megjithatë, bie në sy edhe fakti se 12 për qind e njerëzve votuan për “asnjë nga të mësipërmet” për të marrë drejtimin e qeverisë britanike.

“Është një garë shumë e ngushtë për vendin e parë dhe të dytë aktualisht”, thotë për BBC, Patrick English, drejtor i asociuar i ekipit të kërkimit politik dhe social të YouGov.

Ai shton se kur studiuesit kryen balotazhe, për të parë se cilët deputetë do të dilnin në krye kur të mposhtnin pretendentët në dy vendet e para, Wallace doli në krye kundër të gjithë të tjerëve dhe me “diferenca të mëdha – deri në 20 për qind mbi Rishi Sunak , mbi Liz Truss dhe mbi Jeremy Hunt”.

Boris Johnson ka dhënë sot dorëheqje që do thotë se tani do të ketë zgjedhje lidershipi për të vendosur se kush do të bëhet udhëheqësi dhe kryeministri i ardhshëm konservator.