Arrestohet një zyrtar i Komunës së Prishtinës, regjistronte prona pa i verifikuar

Policia e Kosovës njofton se sot ka arrestuar një zyrtar të gjendjes civile në Komunën e Prishtinës, pasi dyshohet për veprat penale  ‘keqpërdorimi i pozitës apo autoritetit zyrtar’ dhe ‘falsifikim i dokumentit’.

Në njoftim bëhet e ditur se i arrestuari është zyrtari me inicialet R.M., 64-vjeçar.

Tutje, thuhet se i dyshuari ka regjistruar persona pa bërë verifikimin se a plotësohen kriteret për regjistrim duke bërë që disa nga të regjistruarit të krijojnë identitet të dyfishtë (identitet të Kosovës dhe një shteti fqinj).

“Gjatë kontrollit janë gjetur dhe në cilësi të provave materiale janë sekuestruar përkohësisht: një telefon celular; 60 fishekë të kalibrit 7.62 mm; një karikator i armës; dokumente të ndryshme, certifikata, vërtetime të regjistrimit, foto të librave amzë dhe dokumente të tjera të personave të ndryshëm”, thuhet tutje në njoftim.

Me aktvendim të prokurorit të shtetit, të dyshuarit i caktohet masa e ndalimit prej 48 orëve dhe dërgohet në qendrën e mbajtjes. /Telegrafi/