Zbulohen dy ilustrime origjinale të “Librit të Xhunglës” pas më shumë se një shekulli

Pas më shumë se një shekulli në errësirë, dy ilustrime origjinale akvareli për librin e famshëm të Rudyard Kipling, “The Jungle Book”, janë rikuperuar, pasi qëndronin të varura prej vitesh në muret e një shtëpie familjare në Londër.

Anëtarët e familjes, të cilët kanë zgjedhur të mbeten anonimë, thanë se vizatimet nuk ishin trajtuar kurrë si vepra të rëndësishme arti. “Ishin thjesht pjesë e shtëpisë sonë. Të zbulojmë se ato rikthejnë një pjesë të humbur të historisë vizuale të ‘Librit të Xhunglës’ ka qenë plotësisht e papritur,” u shprehën ata.

Një portofol i rrallë i vitit 1903

Ilustrimet janë krijuar në vitin 1903 dhe ishin pjesë e një portofoli luksoz me titull “Sixteen Illustrations of Subjects from ‘The Jungle Book’”, i porositur nga shtëpia botuese Macmillan Publishers në vitin 1902. Portofoli u botua në vetëm 500 kopje, veçmas nga libri origjinal që kishte dalë në vitin 1894.

Një nga akvarelet, i realizuar nga Edward Detmold, paraqet Mowglin me Bagheeran, panterën e zezë. Tjetri, nga vëllai i tij binjak Charles Detmold, ilustron “Cold Lairs”, strehën e majmunëve Bandar-log.

Me këtë zbulim, numri i ilustrimeve origjinale të njohura nga ky portofol shkon në gjashtë. Katër të tjerat ruhen në koleksione private, në Natural History Museum dhe në National Trust.

Dalin në ankand në mars

Shtëpia e ankandeve Roseberys në Londër do t’i ofrojë të dyja veprat për shitje në muajin mars. Çdo ilustrim pritet të arrijë një vlerë rreth 20 mijë dollarë.

Ekspertët e artit e kanë cilësuar këtë si një zbulim të jashtëzakonshëm në historinë e hershme vizuale të një prej tregimeve më të dashura të letërsisë botërore, duke e konsideruar gjithashtu një mundësi të rrallë për koleksionistët dhe admiruesit e veprës së Kipling./KultPlus.com