Susan Sarandon do të nderohet me Çmimin Ndërkombëtar Goya 2026

Aktorja amerikane Susan Sarandon do të jetë fituese e Çmimit Ndërkombëtar Goya 2026, ka njoftuar të mërkurën Akademia Spanjolle e Kinemasë. Ceremonia e ndarjes së çmimit do të mbahet më 28 shkurt në Barcelonë.

Në një deklaratë zyrtare, akademia vlerësoi karrierën “të gjerë dhe mbresëlënëse” të Sarandon, duke theksuar se ajo përfaqëson “kombinimin e përkryer mes talentit dhe suksesit profesional, glamurit dhe angazhimit shoqëror e politik”.

Susan Sarandon është një nga figurat më të njohura të kinemasë botërore, me role ikonike në filma si “Thelma & Louise”, “The Witches of Eastwick”, “The Rocky Horror Picture Show”, “Atlantic City” dhe “Dead Man Walking”, për të cilin fitoi çmimin Oscar për Aktoren më të Mirë.

Çmimi Ndërkombëtar Goya u krijua për të nderuar personalitete që kanë dhënë kontribut të veçantë në kinematografi si art që lidh kultura dhe audienca në mbarë botën./KultPlus.com